Abakada ng Pag-ibig: FRANCESCA Chapter 1

 FREE TAGALOG ROMANCE NOVELS

Abakadang Pag-ibig: Alexandra

Abakada ng Pag-ibig: Bianca

Abakada ng Pag-ibig: Catlyn 

Abakada ng Pag-Ibig: Desiree 

 

Abakada ng Pag-ibig: Elaine 

ABAKADA NG PAG-IBIG: FRANCESCA 

by Maia Jose

 

Copyright Maria Teresa C. San Diego

All Rights Reserved

 

Published in print by Valentine Romances

Books for Pleasure, Inc.

First printing 1998 

ISBN: 971-502-888-8 

TEASER:

        Nag-artista si Francesca at na-in love sa ka-loveteam na si Bobby Bauzon. Mabait ito at maasikaso pero hindi naman siya niligawan. Lumabas pa sa showbiz magazines na may itinatago raw itong girlfriend na kolehiyala.

Madali para kay Francesca ang humarap sa camera dahil totoo ang damdaming kanyang ipinapakita. Pero naging napakasakit para sa kanya ang isiping umaarte lang si Bobby sa tuwing sinasabi sa bawat eksena na minamahal siya.

CHAPTER 1

IKAWALO pa lamang ng umaga at kabubukas lang ni Francesca ng kanilang real estate booth sa bukana ng Emerald View Resort sa Cebu.

        Napabuntonghininga ang dalaga.

        “Isa na namang nakakabagot na araw,” bulong niya sa sarili.

        Palibhasa’y tapos na ang tag-init ay halos wala nang dumadayo sa naturang resort. At lalong wala nang nagagawi sa maliit na booth ng Golden Vista Real Estate Company.

        Kung ilang ulit na ngang kinukumbinse ni Francesca ang Lolo Frank niya na isara na muna ang booth nila sa Emerald. O kaya’y palitan man lang siya ng ibang ahente sa pagbabantay roon.

        Pero hindi pumayag ang matanda.

        Hindi na siya nadala. Kailan ba naman siya nanalo sa diskusyon sa lolo’t lola niya? O maging sa mommy niya?

        Lagi namang ganoon. Sunud-sunuran siya sa kagustuhan ng kanyang pamilya. Sila raw ang higit na nakakaalam sa ikabubuti niya.

        Lolo niya ang pumili ng kurso niyang Business Management. Pagka-graduate naman niya noong isang taon ay agad siyang itinalaga nito sa sariling real estate company. Walang  kahit anong posibilidad na magtrabaho siya sa ibang larangan o kompanya.

        Muli, may kumirot sa puso ni Francesca sa alaalang iyon. Pero pilit niyang ibinaon uli ang nagising na emosyon. Natuto na siyang huwag pagbigyan ang sarili na mag-self pity. Wala rin namang mangyayari. Magiging miserable lang ang araw niya.

        Konsolasyon na niyang kumportable naman ang maliit niyang booth. Hindi iyon katulad ng ibang mga di-permanenteng istruktura na kadalasang itinatayo ng mga real estate agencies sa tabi ng daan.

        Palibhasa’y opisyal na marketing arm ng Emerald View Resort ang Golden Vista Real Estate Company, binigyan sila ng maliit na puwesto sa mismong bukana ng marangyang lobby nito. Kaya naman kahit tatlong metro kuwadrado lang ang booth na iyon ay air-conditioned naman at de-carpet.

        May babaing pumasok sa lobby. Pinay. Mga kaedad lang niya.  Nag-iisa. Nakapantalong maong at polo na nakalilis ang mga manggas. Naka-moccasins.

        Mabilis na umikot ang paningin nito sa lobby. At tumigil sa poster na nakapaskel sa gilid ng booth ni Francesca.    

 

Do you want to be a lifetime member of the Emerald View Resort Club?

Or do you want to own a cottage by the sea?

Please inquire here.

We’ll be happy to help you.

 

        Lumipat ang tingin ng babae sa kanya.

        Ngumiti si Francesca.

        “Yes? May I help you?” tanong niya nang agad itong lumapit.

        Naupo ang babae sa silyang nasa harap ng mesa niya.

        “Taga-Grande Films ako,” nakangiti ring sagot ng babae. “Mag-i-inquire sana ako kung paano ang puwedeng arrangement if we shoot some parts of our latest movie here. Puwede bang makipag-exchange deal? I mean, puwede bang wala nang charges dahil magkakaroon naman kayo ng free advertising sa pelikula?”

        Napakurap si Francesca.

        “Grande Films?” ulit niya. “Shooting?”

        Bagung-bago sa kanya ang konseptong iyon. At exciting.

        Hindi pa siya nakakapanood ng shooting. Hindi pa rin siya nakakakita ng artista sa personal.

        Maunawain naman ang ngiti ng babaing kaharap niya. Halatang sanay na sa reaksiyong tulad ng sa kanya.

        “Pelikula nina Laila Gomez at Robert Bauzon,” paliwanag nito. “Introducing their son, Bobby Bauzon. Finally, mag-aartista na rin si Bobby.”

        “Buong pamilya?” nangingislap ang mga matang singhap ni Francesca. “Wow! Idol ko sina Laila at Robert, noong araw pa. Ang gagaling nila. At saka nakakatuwa ang love story nila. Ang tibay. Hindi tulad ng ibang marriages sa showbiz.”

        Hindi niya idinugtong na hindi tulad ng mga magulang niyang naghiwalay noong maliit pa siyang bata.

        Halos kaedad ng mga magulang ni Francesca ang mga sikat na artistang sina Laila Gomez at Robert Bauzon. At noon pa ma’y naging parang fairy tale na sa kanya ang magandang kuwento ng pag-ibig ng magka-loveteam na nagkatuluyan at nakapagmintine ng maligayang pagsasama sa kalagitnaan ng kaguluhan ng showbiz.

        Ang alam nga niya ay matanda lang sa kanya nang kaunti ang kaisa-isang anak ng mga ito na si Bobby Bauzon. At kahit hindi naman nag-artista ang binata ay nasundan niya ang maraming write-ups tungkol dito. Para sa kanya’y parang isang napakasuwerteng prinsipe si Bobby. Ngayo’y mag-aartista na rin pala ito.

        Tumango ang babaing kaharap niya.

        “Family affair ang pelikulang ito,” sagot nito.

        “I’m sure na maganda ang kalalabasan niyan,” tango rin ni Francesca. “Panonoorin ko.”

        Natawa ang kaharap niya.

        “Bago mo mapanood, kailangan munang matapos na i-shoot,” paalala nito. “Paano? Puwede ba iyong proposal ko? Puwede ba kaming mag-shoot dito nang exchange deal?”

        “Ay, naku, sorry,” sagot niya. “Hindi ko na sakop iyan, e. Wala akong authority para sagutin ka riyan. Pero alam ko kung sino ang puwede mong lapitan. Dito rin naman nag-oopisina ang magkapatid na nagma-manage nitong resort. Mga anak sila ng may-ari nito. Sina Ma’am Loida at Ma’am Luisa Ferales. Ang suggestion ko, kay Ma’am Luisa ka lumapit. Mas bata siya at mas approachable. Maya-maya lang darating na iyon.”

        “Ganoon ba?” sagot ng babae.

        “Sasamahan kitang lumapit sa kanya,” pagbuboluntaryo ni Francesca. “Madaling kausapin iyon. Walang kaere-ere.”

        “Sige, thank you,” sagot ng babae. “Teka, kanina pa tayo nag-uusap pero hindi pa nga pala tayo magkakilala. I’m Alice. Alice De Vera.”

        “Francesca,” sabi naman niya. “Francesca Fortuna.”

        “Ay, ang sosyal naman ng pangalan mo,” pansin ni Alice. “I like it. Francesca Fortuna. Iba ang dating, ha? Pero bagay naman sa beauty mo.”

        Natawa lang siya.

        “Ang sarap naman ng trabaho mo,” pag-iiba niya ng paksa. “Napaka-exciting.”

        Nagkibit-balikat si Alice.

        “Exciting, oo,” sagot nito. “Pero napaka-demanding din. Gaya nito, bigla na lang akong pinalipad dito para mag-scout ng mga location. Ora-orada. Kailangang makakuha ako ng lahat ng necessary permits within three days. Ay, nakakaloka.”

        Inggit na inggit si Francesca sa inirereklamong trabaho ng kaharap niya. Marami pa siyang gustong itanong pero namataan na niyang tumigil sa may entrance ng lobby ang itim na Mercedes Benz ni Luisa Ferales.

        “Nandiyan na si Ma’am Luisa,” sabi niya kay Alice.

 

WALA pang kalahating oras ay palabas na uli ng tanggapan ni Luisa Ferales sina Francesca at Alice.

        “I can’t believe it,” iling ng dalagang taga-Grande Films. “Napakadali naman pala talang kausapin ni Ms. Ferales. Walang kuskos-balungos.”

        “Mabait talaga iyon,” sagot ni Francesca. “At saka magaling sa business. Nakita agad niyang maganda ang deal na ino-offer ninyo. Malaking publicity para sa Emerald ang maging setting ng mga major scenes sa pelikula nina Robert Bauzon at Laila Gomez. Makakahatak iyon ng maraming guests sa resort sa susunod na bakasyon.”

        “Thank you sa tulong mo, ha?” sabi ni Alice.

        “Sus, wala iyon,” nahihiyang sagot ni Francesca, sabay kumpas ng kamay. “Mabuti nga at dumating ka. Bored na bored na ako sa kauupo roon sa puwesto ko. Lagi namang maghapon lang akong nakatanga. At least, ngayon, nagkabuhay ang umaga ko.”

        “Alam mo, nanghihinayang ako sa iyo,” sabi ni Alice. “With your looks and your personality, hindi ka bagay na nakatanga lang diyan at at naghihintay ng mapapadaang kliyente para sa inyong real estate company. Ang dapat sa iyo, mas challenging na career. Malayo pa ang mararating mo.”

        Nangiti nang alanganin si Francesca. Ngiting kinapapalooban ng lahat ng kanyang mga pangarap na matagal nang nabigo.

        Naglabas ng calling card si Alice.

        “Ito ang office address at phone number ko sa Maynila,” sabi nito. “Tawagan mo ako sakaling mapasyal ka roon. Matutulungan kita kung maiisipan mong maghanap ng trabaho roon. At saka pagbalik ko rito, kapag nag-shooting kami, kukumbidahin kita, ha? Isasama kita sa mga gimik ng tropa.”

        “Talaga?” tuwang-tuwang sambit ni Francesca. “Sige, thank you, ha?”

 

ISANG buwan pa ang nagdaan bago nakabalik sa Cebu si Alice.

        Parang kaytagal ng isang buwang iyon. Paano, araw-araw ay inaabangan ni Francesca ang pagbabalik ng bagong kaibigan. Sabik na sabik siyang muling magkaroon ng excitement ang kanyang boring na buhay. At inaasahan niyang napakaraming exciting na mga bagay ang magaganap kapag dumating na ang tropa ng Grande Films.

        Hanggang doon lang naman ang kaya niyang asahan. Iyong pangako ni Alice na isasama siya sa gimik ng grupo. Iyon lang ay napakalaking bagay na sa kanya.

        Iyong isang nabanggit nito – iyong tungkol sa pagtatrabaho sa Maynila – hindi na niya pinag-aaksayahang pag-isipan pa. Alam naman niyang hindi mangyayari. Hindi siya papayagan ng lolo’t lola niya.

        Nang muling sumipot si Alice sa lobby ng Emerald, kamuntik nang mapatili si Francesca sa tuwa.

        “Hi!” sa halip ay pagbati niya sa kaibigan. “Ano, tuloy na ba ang shooting ninyo?”

        “Oo,” tango nito. “Ayan, kasunod ko na silang lahat. Dumiretso na kami rito mula sa airport.”

        May tatlong malalaking van na tumigil sa tapat ng lobby.

        “Nandiyan na sina Laila Gomez at Robert Bauzon?” namimilog ang mga matang tanong ni Francesca.

        “Pati si Bobby,” sagot ni Alice. “Teka lang, ha, excuse me muna. Aayusin ko lang ang pag-check in namin. Pero babalikan kita mamaya. Hanggang five ka naman dito, hindi ba?”

        “Oo,” alistong tango niya.

        “Huwag kang uuwi agad, ha?” bilin ni Alice. “Iti-treat kita. At saka ipapakilala kita sa tropa. Baka kung bababa uli sina Bobby mula sa rooms nila, maipakilala na rin kita agad sa kanya. Kung hindi naman, siguradong maipapakilala kita sa kanila sa mga susunod na araw. Four days naman kami dito.”

        “Naku, sige,” tango uli ni Francesca.

        Iniwan na siya ni Alice.

        Dumako naman ang tingin niya sa mga nagsisipag-ibis mula sa tatlong sasakyan.

        Marami palang kasama sa tropang sinasabi ni Alice. Mga mahigit tatlumpung tao siguro ang naglabu-labo sa labas ng lobby.

        Pero hindi nahirapan si Francesca na mamataan ang dalawang taong hinahanap niya. Napakadali namang makilala ang mga sikat na sina Laila Gomez at Robert Bauzon.

        Nakaakbay si Robert kay Laila. Nagtatawanan ang dalawa. Larawan ng maligayang mag-asawa.

        Napabuntonghininga si Francesca.  Ang sarap namang panoorin ng ganoon. Mas masarap siguro kung sarili mong mga magulang ang nasasaksihan mo nang ganoon. Parang kinurot ang puso niya.

        May lumapit sa mag-asawa. Nakipagtawanan din. Lalaki. Binata – iyon ang unang impresyon niya. At kayguwapo. Maaliwalas ang mukha. Matangkad din at matikas ang pangangatawan. Kitang-kita sa suot nitong simpleng t-shirt na walang kuwelyo at pantalong maong na parehong namimintog sa siksik na kalamnan.

        Napaawang ang mga labi ni Francesca.

        Nakalimutan niyang bigla ang kanyang pagkakilig kina Laila at Robert.

        Ang buong pagkatao niya ngayo’y wala nang ibang pinagtutuunan ng atensyon kundi ang binatang alam niyang walang iba kundi si Bobby Bauzon.

        Tunay nga palang para itong prinsipe.

        At sa kauna-unahang pagkakataon ay nadama ni Francesca kung paano matuliro sa isang lalaki.

(Kapag hindi lumabas ang kasunod na chapter pagkatapos nito, pindutin ang > o kaya’y ang Mga Lumang Mga Post na link.)

(Link sa listahan ng iba pang mga nobela.)