Abakada ng Pag-ibig: Niandra Chapter 9

FREE TAGALOG ROMANCE NOVELS

CHAPTER 9

TAMA si Matt. Masama nga ang pakiramdam niya.

        Pero tama rin si Niandra. Dahil pagod na pagod na siya. Ubos na ang kanyang enerhiya sa pagtaas-baba at tuluyang pagguho ng kanyang mga ekspektasyon.

        Ang sama-sama ng kanyang loob. Naninikip ang kanyang dibdib.

        Wala naman siyang ibang mapagsumbungan kung hindi si Queenie.

        “But that doesn’t make sense,” sabi ni Queenie. “Bakit nga ba siya magiging ganoon ka-attentive sa iyo kung simpleng friendship lang ang habol niya? Baka naman sa sobrang katorpehan ng lalaking ito, friendship lang talaga ang tawag niya sa relasyon. Baka hindi lang niya masabi ang salitang relationship at love.”

        “Hay naku, ewan,” iling ni Niandra. “Magmula naman noong araw, ako lang ang laging nagbibigay ng kung anu-anong interpretasyon sa mga kilos niya. Wala naman talaga siyang binanggit na konkretong pahiwatig man lang ng panliligaw. This time, bahala na siya. Basta ako, ayoko na. Sukod na ako sa kahuhula kung ano nga ba ang kanyang intensiyon. As far as I’m concerned, ang linaw-linaw no’ng sinabi niya kanina. ‘A token of friendship’. Iyon na iyon.”

        “So what do you intend to do?” tanong ni Queenie.

        “Ano pa, e, di wala,” sagot niya. “Ano pa nga ba ang gagawin ko? Pero huwag na siyang aasa na bibigyan ko pa siya ng oras at atensiyon na gaya ng dati. Aba, masaya siya.”

        “You don’t want to be his friend?” tanong ni Queenie.

        Bumigay na si Niandra.

        “Hindi naman sa ganoon at alam mo iyon,” papiyok nang sagot niya. “I just can’t handle it that way. Hindi ko kayang maging kaibigan lang niya when all the while, I’m feeling something else. Luging-lugi nga ako rito, e. Na-develop na ako nang husto. Problema ko na nga kung paano ko buburahin ang feelings kong ito. Di lalo na akong nahirapan kung magpapaka-good  friend pa kuno ako sa kanya.”

        Tinapik siya ni Queenie sa likod.

        “You’re right,” sang-ayon nito. “Ang gusto ko lang namang marinig ay ‘yung honest ka sa sarili mo. That way, mas makakapagsimula ka na agad ng self-healing. Kahit mahirap at masakit, you can do it.”

        “Nakayanan ko na ang ganito noon,” sagot niya. “Mas makakayanan ko ngayon.”

 

PERO hindi naman kasi inakala ni Niandra na sasabayan ng isa pang krisis ang problema niya.

        Kinabukasan din, may naglabasan nang mga write-ups tungkol sa kanilang dalawa ni Matt sa mga entertainment gossip columns.

        Kung bakit naman kahit iilang beses lang silang kumain sa labas ay lagi palang may nakakapansin sa kanila. Halos lahat ng kanilang mga date sa labas ng bahay ay nakatala sa mga tsismis columns.

        May rasyon si Niandra ng lahat ng mga major dailies kaya nakita niya agad ang mga write-ups.

        Halos iisa ang tema ng lahat ng iyon. May nabubuong relasyon sa pagitan  ng sexy comedienne na si Niandra Moran at ng heredero’t big businessman na si Matt Miravilla. Nakabingwit daw ng matabang isda ang entertainer. Pero nagpupustahan na raw ang karamihan na hindi tatagal ang relasyon ng dalawa. Ang hula nila ay pinaglalaruan lang ni Matt si Niandra. Hindi raw isang entertainer lang ang seseryosohin ng isang Miravilla.

        Tatawagan na sana ng dalaga si Lino nang maunahan siya nito.

        “Nabasa mo na ba?” direktang tanong agad ng kanyang manager.

        “Lahat no’ng sa major dailies, meron akong kopya,” sagot niya.

        “Mero’n din sa mga tabloid,” balita ni Lino. “Pero mas mabuti kung huwag mo na lang basahin. Maiinis ka lang. Ang kailangan nating gawin ngayon ay magplano. Paano mo ba gustong sagutin ang mga ito?”

        “Ba’t ko pa sasagutin?” pakli ng dalaga. “Ayoko nang patulan.”

        “Good,” sang-ayon ni Lino. “Ang mabuti pa, turn down the ringer of your phone para hindi mo na kailangang sagutin ang mga tatawag. Turn off your answering machine and don’t answer your cellphone, too. Panay outgoing messages ka na lang para hindi ka makulili sa katatawag ng mga reporters na siguradong mag-uunahan sa pagkuha ng reaction mo. Just call in dito sa office kung may kailangan ka. Pag may importante naman akong kailangang maipaalam sa iyo, ite-text kita. Don’t open your door to anybody na hindi tao natin.”

        “Okay,” matamlay na sagot ni Niandra. “Magbabasa na lang ako ng pocketbook dito sa bahay.”

        Ganoon naman talaga ang balak niyang gawin. Dalawang araw din niyang napanindigan iyon. Walang TV. Walang radyo. Walang diyaryo o magasin.

        Pero noong pangatlong gabi, bumigay rin si Niandra. Ang katuwiran naman ng dalaga, late night show ang panonoorin niya. At sosyal na talk show iyon. Hindi tipong pang-showbiz. Siguro naman, wala siyang maririnig doon tungkol sa mga intrigang kinapapalooban niya.

        “Nightcap” ang pamagat ng gabi-gabing programa, on air mula alas-onse hanggang alas dose. Kilalang society columnist din sa diyaryo ang host na si Francisco “Kit” Lagman.

        Nagulat na lang si Niandra nang makitang kabilang sa mga guest nang gabing iyon si Peachy Miravilla – misis ni Harry Miravilla.

        Doon pa lang sana ay nakatunog na siya. Dapat ay pinatay na niya ang TV o inilipat ng channel. Pero malay ba niyang makikisangkot din sa intriga ang socialite? Hindi niya naisip na kahit ang host na si Kit Lagman ay tsismoso nga rin pala.

        “And how are you, Peachy?” tanong ni Kit.

        “Oh, I’m fine, Kit,” sagot nito. “Happy and fulfilled with my husband and kids.”

        Napaismid si Niandra. Alam naman kasi ng lahat na hindi masaya ang pagsasama nina Peachy at Harry. Kabi-kabila pa rin ang mga girlfriends ng lalaki. Hindi na ito nagbago.

        “May maugong na balita ngayon tungkol sa pinsan niyang si Matt, a,” sabi ni Kit. “Any comments?”

        Napadiretso si Niandra sa pagkakaupo sa sopa. Gustuhin man niyang patayin ngayon ang TV ay hindi na niya magawa. Hindi na niya mapigil ang kanya ring curiosity sa isasagot ni Peachy.

        “A, iyon ba?” natatawang pakli ng babae. “Wala iyon. Alam mo naman itong mga lalaki. It’s already in their nature to flirt around. Play around. Lalo na kung may willing and able naman na makipaglaro, hindi ba? But there’s no need to be worried. When they finally settle down, they know whom to choose naman, e. Gaya nga ni Matt. The family has always been waiting for him to finally settle down with Fiona Gabaldon of the respected Gabaldon clan of Cebu. And that’s exactly where he is right now – at the ancestral home of the Gabaldons in Cebu, visiting his godfather, Fiona’s dad, Tito Fil Gabaldon. Kasi nga nagka-stroke si Tito Fil recently, hindi ba? So we won’t be surprised if Tito Fil asks the two of them – Fiona and Matt – to speed up the marriage plans.”

        Nanigas si Niandra sa kanyang pagkakaupo. Nanlamig. Naging parang estatwang yelo.

        Hindi na niya narinig ang iba pang pinag-usapan sa TV.

        Hindi rin niya alam kung paano siyang nakatulog nang gabing iyon. Bumabalik sa isip niya ang sinabi ni Matt noong huli silang nagkita. “Huwag kang mag-alala, mawawala ako for a few days. May lalakarin lang akong importante. Obligasyon.”

        Obligasyon nga pala iyon. Mabigat na obligasyon. Dahil ang pinuntahan pala ni Matt ay ang ang mapapangasawa nito at ang bibiyenanin.

        Kinabukasan nang umaga, napatunayan nga ang mga sinabi ni Peachy. Dahil nasa diyaryo na mismo ang litrato ni Matt, kasama ang naka-wheelchair na si Don Filemon Gabaldon at ang anak nitong si Fiona. Kuha ang litrato sa hacienda ng mga Gabaldon sa Cebu nang nakaraang araw.

        Kung may pananagutan na pala si Matt, bakit pa siya nito muling nilalapitan? Alam naman ng binata na may kontrobersiya ang kanilang paghihiwalay. Parang imposibleng isipin na pupuwede silang maging magkaibigan lang ngayon.

        At bakit idiniin pa ng binata noong una nilang pagkikita na single pa rin ito? Ipinakahulugan niyang ang ibig sabihin niyon ay unattached.

        Iyon pala’y may isang Fiona Gabaldon sa buhay ni Matt.

        Oo nga naman. Heredera si Fiona Gabaldon ng isa sa pinakakilalang old rich families sa Cebu. De buena familia. Kakulay ng dugo ng mga Miravilla. Ang dugong nananalaytay sa mga ugat nito.

        Ang tanga-tanga talaga niya, paninita ni Niandra sa sarili. Balewala rin pala ang kanyang paninindigang pantay-pantay ang lahat ng tao kung hindi naman ganoon ang pananaw ni Matt.

        Sa paningin ni Matt, isa lang siguro siyang novelty. Nakakatuwa siya rito dahil sa naabot niyang katanyagan. Biro mo, isang hamak na probinsiyanang naging big time entertainer. Pero katulad ng sinabi ng mga kolumnista, entertainer pa rin siya’t malayo ang katayuan sa kinaroroonan ng pamilya Miravilla.

        Eksakto ang mga salitang binitiwan ni Peachy Miravilla:

        “Alam mo naman itong mga lalaki. It’s already in their nature to flirt around. Play around. Lalo na kung may willing and able naman na makipaglaro, hindi ba? But there’s no need to be worried. When they finally settle down, they know whom to choose naman, e. Gaya nga ni Matt. The family has always been waiting for him to finally settle down with Fiona Gabaldon of the respected Gabaldon clan of Cebu.”

        Iyon na.

        Dahil si Fiona ay tulad din ni Peachy. At hindi tulad niya.

        Bahagi lang siya ng paglalaro ni Matt. Tulad din ng turing ni Peachy sa maraming paglalaro ni Harry kahit ngayong mag-asawa na ang dalawa. Ang mahalaga lang dito ay kung sino ang legal at kinikilalang Mrs. Miravilla.

        Sumulak ang dugo ni Niandra sa kanyang ulo. Pakiramdam nga niya’y nanlaki ang kanyang ulo sa galit.

        How dare he? Ganoon lang ba kaliit ang tingin ni Matt sa kanya? Kung noong araw ay wala itong narating sa kapoporma, akala ba nito’y porke entertainer na siya ngayon ay nag-iba na ang kanyang standards? Na papatol na lang siya basta at makikipaglaro?

        Puwes, sige, kung ganoon ang gusto ni Matt, ganoon ang palalabasin niya. Gamitan na kung gamitan.

        Tumawag si Niandra kay Lino.

        “I want to be on Kit Lagman’s show tonight,” sabi niya. “Can you arrange it?”

 

“WOW, I’m so honored to have you here, Niandra,” sabi ni Kit. “And such a timely guesting, too. Mahirap ka raw maimbita sa ibang shows. Sinasabi tuloy nilang nagtatago ka.”
        “Of course not,” sagot niya. “Bakit naman ako magtatago? I have nothing to hide.”

        “Ikaw kasi ang topic of the moment sa lahat ng media,” sabi ni Kit. “Kayo ni Matt Miravilla. I’m sure you heard his cousin-in-law’s comments last night. Ikaw naman, do you have anything to say? Pinaglalaruan ka lang daw ni Matt.”

        “So? What else is new?” parang balewalang sagot niya. “Nakikipaglaro din naman ako sa kanya.”

        At binuntutan niya ito ng kanyang malutong na halakhak.

        “So everything’s just a game?” paniniguro ni Kit.

        Nagkibit-balikat si Niandra.

        “Masuwerte siya’t naging type ko ring makipaglaro sa kanya,” pahayag ng dalaga. “A lot of men have tried and failed, you know. But I choose my playmates well. And I set the rules. Ayoko nga sana ng ganitong naglalaro in public. But since it has been out for the last few days, maybe it’s time to say game over.”

        Tumaas ang kilay ni Kit.

        “Are you sending a message for Matt?” tanong nito. “Or is that also for Fiona?”

        “I don’t really know her personally,” sagot ni Niandra. “And frankly, Matt never told me about her. Hindi ko alam na ikakasal na pala sila. I didn’t even know he had a girlfriend. Had I known, hindi ako makikipaglaro sa kanya. I’m single and totally unattached at ganoon din ang hinahanap kong kalaro. So I guess, disqualified na si Matt.”

        “But isn’t that beside the point?” tanong ni Kit. “Kung nakikipaglaro ka lang, as you put it, bakit kailangan pang single and unattached ang iyong playmate?”

        “Because I want to have my playmate’s full attention during the game, no matter how short-lived,” sagot ni Niandra. “I play a very intense game, Kit. Hindi puwede ang half-hearted involvement lang.”

        “So that means you’ve had a very intense game with Matt, before you learned about his other involvement,” giit ni Kit.

        “I guess you can put it that way,” sagot ni Niandra. “Kami kasi ni Matt, we go back a long way. Nasa high school pa lang ako when he started pursuing me. Alam ito ng lahat ng townmates ko sa Sta. Cecilia – the town right beside the Miravilla’s Hacienda Cecilia. He pursued me for four years then followed me all the way to Baguio. But I was young and idealistic then so I turned him down. We lost touch. Recently, he found me again. This time, I didn’t snub him. I’d grown up a lot. Nakita kong well-matched na kami. But I think I grew up a lot more these past few days – enough to get over this game. So, sorry, Matt. It was fun but the rules say you’re out.”

        “Fiona should be happy about this,” sabi ni Kit.

        “I don’t really know,” pagkikibit-balikat ni Niandra. “Pero kung ibabatay ko sa point of view ni Peachy, parang tanggap na yata nila na ang kanilang mga husbands or husbands-to-be ay may kalaro pa sa labas ng bahay. In that case, kahit kumalas ako sa game namin ni Matt, he’ll just find other playmates. How sad, ‘no? Ako, I can never be in a relationship like that – much less a marriage like that. Hindi na baleng hindi kami de buena familia, basta buo ang pamilya at totoo ang pagmamahalan.”

        “So you’re still looking forward to getting married after playing these games?” tanong ni Kit.

        “Of course,” sagot niya. “Alam kong marami ang nagtataas ng kilay sa akin ngayon. They already condemn me for playing my games. Okay lang. But I’m sure I’m going to meet the man who won’t care about all my past games. He will only care about our game – and then we’ll both play for keeps.”

        “That’s a tall order,” sabi ni Kit.

        “True,” tango ni Niandra. “And that means he’s going to be a very extraordinary man.”

        “Are you sure he’s not Matt Miravilla?” tanong ng host.

        “Disqualified na nga siya, hindi ba?” sagot ni Niandra. “When I play for keeps, I don’t intend to be a kept woman of a married man. No, thanks. No way.”

(Kapag hindi lumabas ang kasunod na chapter pagkatapos nito, pindutin ang > o kaya’y ang Mga Lumang Mga Post na link.)

(Link sa listahan ng iba pang mga nobela.)